جاى الطوفان

وهياخد كل الناس فى جرايرو

امشى مع التيار ياولدى وسايرو

لا تغور فى غوايرو

اياك يا وليدى تعافر

شوفلك اى سفينه وسافر

اوعاك تتعلق فى حبال الصبر الدايبه

طول عمرها بلدنا سايبه

لا موديه ولا جايبه

لو العدو دخل البلد اوعى تقاوم

خليك فى سريرك نايم

اوعى يقولك ده عدوك

تعمل راجل وفى توك

تطلع ماسك المنجل

وتدور تتحنجل

لا دى بلدنا ولا نعرفها

مابتعرفناش غير لما تعانى

تندهلنا بالصوت الحيانى

واما تزهزه ترميلنا قرفها

وتنسانا وتسيبنا فقاره وحزانه

مع انها عرفانا

اياك ياوليدى تحنلها

لاانت بتشرب من مية نيلها

ولا جه فى يوم غنيت مواويلها

اديتك ايه علشان تديلها

غير بؤس وفقر

وعيشه فى قبر

عريان فى عز البرد

بتاكل فى طوب الا رض

وفى الاخر تطلع متداين

ويقولو ده خاين

عارف مين هو عدوك

عدوك هو اللى بيقتل احلا مك

 اللى بينخر زى السوس فى عضامك

اللى بيحبس جواك صوتك

وبيسرق منك قوتك

عدوك مش لابس برنيطه ولا جاى من بره

عدوك اللى مشيك جنب الحيطه

ومخلى عيشتك مره

خليك فاكر اوعى تعافر

 احمد والحاج احمد واحد

كلو بياخد

بيمصو فى دمك وفى دم ولادك

ويبيعو فى تراب اجدادك

طول ما النار ماجتش ناحية خلقاتك

اوعاك تتحرك

خليك متورك

هتقولى العدو هيهينك

ما انت طول عمرك متهان

وطالع دينك

وماشى حفيان عريان

هتقولى هينهب وهيسرق

ما انت طول عمرك منهوب

ماجتش عل المره دى

خليك راسى وهادى

وسيب المركب تغرق

سيب الناس اللى بتاكل خيرها تدافع عنها

ودورلك على بلد غيرها تاكل منها

اوعى تغيب وتحن العدو قاسى

عمرو ماهيفوق قساوتهم

ولا انت ناسى كلاب حراستهم

من الاخر هى بلدهم

طول عمرهم مبرطعين فيها هم وولادهم

سيبهم يشوفو الذل زيينا

يمكن يحسو باللى اتعمل فينا

هيغنولك فى غناوى وهيحكولك فى الامجاد

وهتطلع مشايخهم بفتاوى ان خروجك هو جهاد

ماتصدقش كلامهم

خليك ندل وواطى

ولما تشوف الريح علطول طاطى

ياولدى بلنا دى منجوسه

ما تصدقش انها محروسه

دانا ياما كنست دروبها

وحاربت فى كل حروبها

وفى الاخر وزعو فى التركه

اللى خدلو قصر واللى طالتلو شركه

اتفرج من بره وشوف

هتلاقى اسودنا بقت خرفان

ورجالتنا بقت من الخوف نسوان

هتشوف كل الهتيفه بتخلع

ويسيبو البلد تولع